Am 29. isch wiedrmol ä Tag gsii, wo eus sicher nid langwilig worde isch.
08:00 Treffpunkt uf em Mältigäberg und den ab mit em Schiltter ufe Dürrberg. Nach dr holprige Fahrt het paarne vlt chli s Steissbei weh do, abr immerno besser als laufe. Uf em Dürrbode heimer den d Arbeit betrachtet, wo mir no z erledige gha hei. Han gmeint es isch letzt Johr scho öbis gmacht worde?!
Mit Heugable, Motorsägi und anderem Werkzüg heimer eus denn and Arbeit gmacht. Glii hend sich d Huffe an Schwarzdorn und anderem Gstrüb türmt und mä het sich ans Füüre gmacht. Während dr Mittagspause het sich denn diä ersti Müdigkeit zeigt. Vorallem au wenn mä an das denkt het, wo no bevor stoht. Abr lieber witermache, sunst werde mir jo sicher nid fertig. Am 4ii isch denn dr grössti Teil vo eus wiedr Richtig Mältigä-Dorf, wills scho glii mit dr Indiacanight witergange isch. Mit ganze drei Mannschafte heimer an dem Grümpeli vo de Bohnanzas teilgno. Bi paarne vo eus hets zwar eher nach Ballettilage statt Indiaca usgseh, abr es hets sogar ä Team ind Viertelfinal gschafft. Nach de Spiel, wo bis am halb 12ii zNacht gange sind, heimer denn dä ereignissrichi Tag in dr Bar chli chöne loh sacke.

Do hets no Fotis vo dem Tag…