45 Johr Bohneschränzer

Wenn das nid ä Grund zum firre isch?!
Das hend mir eus au denkt und hend eus an dem verregnete Samstig  ufe Weg ins Emmental gmacht. Ä motivierti Gruppe vo 16 Lüt isch vom Olympische Komitee vo de Emmentaler Spiele zuegloh worde und het sich in de Diszipline Hufise werfe, Hau den Ball, Hafersack schwinge, Käslabyrinth, Dart, Nagle und Tisch Curling gmesse. In Gruppe vo 4 Persone hend mir eus dr ganz Morge dur die Diszipline kämpft.
Bevors denn am Mittag öbis gege Hunger geht het, sind no d Prise vo dem Morge verliehe worde. Zerst sind mir zum Spezialpris für diä meiste Schläg bim Nagle cho. Mir hend zwar denkt, dass diä uf d Blöck chöne neume druf schloh, abr anschienend nid. Es hets nämlich eini vo dene zweune gschafft am meiste Versüech z bruche und zur Zärtlichste ernennt z werde. Denn sind mir witer zu Ernennig vo de wirkliche Sieger gange. Niemer gringers als euse Tambi het sich diä Goldmedaille untere Nagel grisse und alle zeigt wie mä diä Spieli richtig spielt. Nebe em Titel als Zärtlichsti han ig denn no dörfe dr Pris füre zweute Platz entgege neh. Uf em dritte Platz isch euse Chaffeur glandet.
Und denn hets endlich Esse und äs gmütlichs Zämmäsitze geh, bevor mir wiedr euse Weg Richtig Mältigä in Agriff gno hei. Ganz verbi isch die Reis denn abr doch nid gsii z Mältigä. Zweu Neumitglieder hend eus zumene Apero iglade wo denn chli länger adurt het. Ei Frog beschäftigt mi abr immerno sit denn: „Wie viel Mikrowellepopcorn cha mä dehei ha?!“
Gheimtipp: Falls irgendöber mol unbedingt ä Packig Mikrowellepopcorn brucht, ig würd mol bim Fabienne goh lüte.

Do hets no Fotis vo dem Tag…