Fasnachtssamstig 2023
Sa, 18.02.2023

Wie startet mä guet in Tag? Genau, miteme Apéro.
Und wenn den d Frenkeschränzer no äs Ständeli nebedra spiele, ladet mä se doch au no grad ih.

Vor luter Apéro hend mir nid mol Zit gha zum goh d Wäge aluege, will mir scho hend müsse goh istoh. Müsse mir hald mit dem bis nach em Umzug warte.
D Pause zwische em erste und em zweute Durchgang isch ungwöhnlich lang gsii, abr eus het das nid gstört, will so hend mir no uf d Wäge chöne. Spötischtens do isch denn au ufgfalle: oke Bohnanzas, mir gsehe wirklich ähnlich us wie dir. Abr wenn ig ehrlich bin, das stört mi nid. #fürmistimmtseso
Im Gegesatz zu andere hei mir dr zweut Durchgang chöne ganz laufe und nid neume mitte dir bliebe stoh. Nach em Spiele uf dr Treppe vor dr Kirche und im 10ii sind mir den au scho glii witer uf Erschbel. Dört hets öbis Feins zum zNacht geh und mir hend natürlich no eis-zweu gspielt. Dört het mä gseh, dass au zweu Schlagzüger an ei Schlagzüg passe und wenn denn dr eint no d Blöck nimmt, sind alli versorgt. Nach dr Pause im Rössli z Erschbel sind mir den witer uf Büsserach. Dank em Carahänger heimer nid nur es fahrends Instrumentedepot sondern au ä Garderobe debi gha. Will bi dene tropische Bedingige in dr Halle z Büsserach sind eusi schottische Umghäng definitiv zu warm gsii. Am 2 am Morge het eus den dr Car wieder zrugg uf Mältigä brocht. 

D Fotis findsch do