Mein Ziel Savognin!

Am 01. März heimer eus richtig Bündnerland ufe Weg gmacht. Im sunst so ruhige Mältigä isch richtig viel los gsii, will nid nur mir, sondern au dr TV und d Füürwehr hend wele goh Skifahre das Wucheend. Dr erst Halt hei mir den im Heidland gha. Zerstmol öbis zMorge esse und sich ready mache, zum den nocher goh Skifahre, isch dr Plan gsii. Und lugg au do, gsehe mir dir TV scho wiedr. Dört hend sich denn abr eusi Wege trennt. Wo mir denn z Savognin acho sind, het eus kei eitel Sunneschin erwartet. S Wetter uf de Piste isch so zue gsii, dass mir zerst mol euses Hotel bezoge hei und ins Alpechic sind öbis goh trinke, bevor eus dr Apré-Ski-Liner ins Roggis brocht het. Trotz em schlechte Wetter het sich s Roggis guet gfühlt und lug au ah, äs bekannts Gsicht heimer au no atroffe. „Ä Mältiger wo zu sinde Wurzle zrugg kehrt“. Wenn au nur für ei Obe. Nachere sprützige Fahrt mit em Aprés-Ski-Liner zrugg zum Hotel hets denn öbis zNacht geh. Pizza isch immer guet. Wiedr gstärkt sind denn einigi no witer und anderi goh schlofe.

Dr zweut Tag vo eusem Skiweekend het miteme Zmorge gstartet. Denn heimer eusi Ski und Schlitte packt und es het gheisse „ab auf die Piste“. Einigi hets scho chli frühner zum gmütliche Teil zoge und anderi hends Skibilett usgnutz bis d Lift abgstellt hei. Nacheme Abstecher ins Roggis het denn wiedr Pizza (odr Fizza?) geh im Hotel.
(Füssi Füt händ den fustig afo fätze…you know when you know)

Nach em Zmorgen heimer eus denn am dritte Tag ufe Heiweg gmacht.

Zämmägfasst cha gseit werde: Mir hend ä super Wucheend in dä Bündnar Berga gha.

Do findsch d Bilder von dem Wucheend.