„Mein Ziel Savognin“ hets au das Johr wiedr bi eus gheisse. Wo mir eus ufe Weg gmacht hei ins Bünderland und bim Heidi in ihrem Land no ä kurze Stopp igleit hei, hei mir noni gaht, dass mir d Saison 2020 z Savognin werde abschliesse. S Wetter am Samstig isch denn au gar nid so schlecht gsii und mir sind d Pistene abbrettert. Ä paar hei fast nid gnue vo de Pistene chöne becho, anderi sind den bi Zite ins Roggis gange. Mit Bündnerplättli, Salitos und Bier sind alli versorgt gsii und niemer het öbis z meckere kha. Meh drvo müsse diä wo nid debi gsii sind nid wüsse. Mit em Büsli zrug uf Savognin und Zimmer bezieh. S hei abr alli no äs Hüngerli odr Glüstli verspürt, drum hets ä Late Night Pizza geh, bevor denn alli in ihri Träum itaucht sind.

Au am zweute Tag hei mir dr Drang kha uf d Piste z goh, au wenn Wellness au no verlockend gsii wär. Obe bim Gipfel isch s Wetter hüt nid so gut gsii, wo durs einigi nid so lang uf de Piste ghalte het. Im Roggis schint hald immer d Sunne. Eusi Hardcoreskier sind den abr no Rundi um Rundi gfahre. Au hüt het dr Late Snack nid dörfe fehle. Ä paar hei s Lust uf Fondue gha, dass mir bald innere Käsduftwulke gsässä sind. Liebi Kinder passet uf bim Fondue ässä, paar Lüt gheits ume und denn hesch s Füür ufem Tisch und wenn denn d Servierdüse s no mit Wasser will putze, denn haltet se ab, isch besser so. Abr das hei dir jo den zum Glück gmacht.

Danke schottische Gast fürs Organisiere. 

Hope we will see us soon. 

Aso mir hei s toll kha z Savognin und hei vom Corona nid so viel mit becho. Bis mir denn zurg cho sind und d Skigebiet gschlosse worde sind (hends grad no gschafft euses Weekend durre z führe). Aso d Savognin hei mir nid so viel Hamster gseh.

Abr mir begebe eua jetzt eh in euse Summerschlof. Klappe zu. Bis zur nechste Vorfasnacht.

D  Fotis findsch do…