Schmudo
Endlich wiedr Fasnacht!!! Nach eim Johr Pause heimer am 5ii am Morge wiedr in d Fasnacht chöne starte. Leider het eus au das Johr Corona nid ganz in Rueh gloh, abr zum Glück isch dr Pädi so multitaskingfähig und cha Pfiffe und Spiele während dr Chesselte. Mitere Mählsuppe bi dr Käthlä und em Michi heimer denn dr erst Programmpunkt vo dr Fasnacht 2022 chöne beende. Danke an diä zweu! Am Nomitag is denn mit dr Kinderfasnacht witergange. Als Rundgang durch Mältigä und Zubel isch sie chli andersch gsii als diä letzte Johr, abr genau glich guet wie sunst ame. Danke de Bohnegeisse und de Abieter vo de Boxestopps! Am Obe heimer denn z Erschbel dörfe am Maskeball spiele. Wer so spontan sone Alass organisiert cha uf Deko verzichte. Mir hend ä super Fest inkl. neue Tanzchoroes kha.

Fasnachtsfritig
Spontan muss mä sii. Kurzerhand heimer euses Programm gändert und sind uf Zubel an ihres Jubiläumsguggekonzert goh spiele. Mir gratuliere euch ganz herzlich zu dene viele Johr. 

Fasnachtssamstig
Dr Umzug z Seebä isch nid so lang odr? Doch ischr… Vorher heimer abr no chöne äs super Apero bim Sandro neh. D Route dur Seebä isch länger als denkt gsii, abr dur Verschiebig vo de Zuschauer isch immer öber am Strosserand gstande. Uf em Schulhuusplatz heimer denn no paar Stück chöne spiele, bevor mir den mit em Car witer uf Hirzebach sii. Dr Ablick dört het s einte odr andere Fasnachtshärz loh höher schlage. Was mir dört atroffe hei, het glaub niemer erwartet. So viel Mensche! Am Obe hend den Spächt und Habicht iglade. „Space. Was isch Space? Ischs dr Ruum wo mir eus drin befinde…?“ Vlt chöne euch das jo eusi ober Spacewikings säge…

Fasnachtssunntig
Leider isch das scho euse letzte Tag vo dr Fasnacht gsii. Mitemene Heimspiel lohnt sich d Fasnacht abr trotzdem guet abschliesse. Nach em Apero bim Yannic und em Ständeli für paar vo eusne Versüchte sind d Chrotteschliffer, Donnerwespi und mir dur Mältigä zoge. Drmit mir dr letzt Tag nomol so richtig hend chöne gniesse hend mir natürlich nid nur ei zweu mol gspielt. Wie lang diä letzte d Fasnacht no uskostet hei, isch nid bekannt. Es isch abr ziemlich sicher nüm am Obe gsii. 

Ab zu de FOTIS!