Maibummel-> abgesagt

Koteletthock-> abgesagt

Denn gits hald das Johr e Corona-Pouletbummel.

S Wetter isch zwar mit dem viele Rege nid so optimal gsii, abr wär störe scho zweu nassi Hünd. Dr Start vo euser Route isch bim Gmeinihuus z Mältigä gsii. Dört hei mir scho s erst Wasser oder so ähnlich chöne trinke. Denn het euse Tourguide dr Toni-Tromboni die chlini Gruppe vo freiwillige Läufer steil dr Berg durfu gführt. Dr eint und diä ander isch scho no ins Schwitze cho. Wer leit au sone Tempo vor?! Abr wie ein vo de Organisatore gseit het: „Mir sind imene Kessel, das heisst mä muss mol uf laufe.“ S tolle am Ufelaufe isch jo s Obe acho und no viel töller ischs wenn mä dobe chan ä Apero neh. Das leu mir eus natürlich nid zweu mol säge. Vom Mätteberg ischs den witergange, bis mir bim Schützehuus gsii sind. Dört hei scho paar saftigi Poulet uf eus gwartet. Diä hei sich schön in dr Wärmi drüllt und vo ihrer beste Site zeigt. Dört sind denn no ä paar fulleri odr (sorry) beschäfftigteri Mitglieder dezu gstosse und mä het di neuste Ereigniss chöne ustusche. Mir freue eus! S einte odr andere Poulet het zwar nomol dr Weg ufe Grill gfunde, abr sie sind trotzdem super gsii. Und au dr Dinkelteigwaresalat isch gut acho. Lebe mir do jetzt plötzlich so gsund, dass mir nüm normali Teigware esse?!

Es isch ä super Obe gsii.

Viele Dank am Roman und am Robin fürd Organisiation.

D Fotis findsch do…