FASNACHTSSUNNTIG
Sonntag, 07. Februar 2016

A dere Stell möchte mir eifach mol am KASSE-DIETER DANKE säge. Dini Unterstützig während der Fasnacht cha me gar nid vergälte. Herzliche Dank, das Du euis mit Dim Wohlwolle und Isatz das Bohnezelt ermöglicht hesch.

Der Fasnachtssunntig het für Euis zum erschte mol in ere ganz neue Form stattgfunge, aber zu dem denn no spöter.

Zerscht hei mir euis bim Michi und der Sabine zumene Apero igfunge und hei denn grad no s Huus besichtig. Mir hei alli afo Bette, das der Rege irgendwenn denn mol söt ufhöre. Aber schienbar het d Frau Fasnacht die bessere Connections zum Petrus und mir hei euis afo Wetterfescht mache.

Ganz knapp hei mirs uf Nunnige gschafft und hei dört schnell der Umzug absolviert. Nocher sie mir wieder zrugg uf Mältige, wo mir als Nummer 1 der Umzug hei dörfe eröffne. Während em Istoh isch der Michi und s Sarah scho cho z Seckle und hei alli Bohni wo in der erste Schicht vom Bohnezelt iteilti si gsie, abzoge. Denn euises Zelt isch scho voller mit hungrige und durschtige Lüt gsi.

Der Rescht isch der Umzug gloffe und het denn vorem Zelt no es chlises Konzertli geh.

Was isch eigentlich das Bohnezelt? Do mir z Mältige jo leider kei Beiz meh hei wo während der Fasnacht offe het, hei mir euis entschlosse, selber unter d Beizer z goh. Mit grosser Unterstützig vom Hänngi Dieter, het s OK-GUGGEKONZERT öbbis gewaltigs uf d Bei gstellt. Nachem Umzug isch das Zelt gfüllt gsi und mir hei dört immer wieder mol es Stück gspielt.

Do mir jo z Mältige mit em Silberquellstübli, der Chaote-Bar und der Spelunkä-Bar no witeri Fasnachtshotspots hei, sie mir denn inere Chliformtation uf d Rundi und hei e riese Plausch gha.

Am Schluss het sich denn sogar no es Schissdreckzügli bildet, wo in allne offene Locations no es paar Party-Lieder gspielt het.

Am zwoi am Morge hei mir immer no Lüüt im Zelt gha und nachdem mir denn au die verköstigt hei, sie mir denn alli zämme no selber ufe e Bartour gange. Zum Glück hei mir am Mentig erscht am Obe der Treffpunkt gha.

Do gohts zu de Fotene.