Am Mentig hei mir e Bitz chönne usschlofe und Kraft für die letschte beide Täg tanke. Motiviert si mir in euisi beid Partybüssli gschtiege und hei der Weg nach Bremgarte unger d Räder gnoh. Do mir es Navigationsproblem gha hei, het der Präsi die Brämgartner müesse alüte und mitteile, das es euis nid ufe erschti Uftritt längt. Mir si denn 10 Minute vorem Uftritt doch noh acho und hei imene Rekordtempo usglade. Denn sie mir wie die Wilde dur d Alstadt gloffe und grad wo der Speaker seit, das mir nid rechtzytig chieme, hei mir unger riesem Gebrüll, d Bühni beschlagnahmt.

Mir hei d Ehr gha, grad nach de Arvy-Hyler z spiele und hei euises Konzert gnosse. Chum sie mir fertig gsi, hei mir grad noch chönne in Schärme flüchte und hei gseh, wie der Petrus e riese Chübel Wasser abekeit het.

Aschliessend hei mir denn no zwoi witeri Konzert gah und hei nocher chli chönne dur Brämgarte zieh. Nach de 02.00 Uhr hei mir der Heiweg wieder in Agriff gnoh und sie denn in de beide Bars go witerfeschte.

Do gohts zu de Fotene.