FASNACHTSFRITIG
Freitag, 05. Februar 2016

Nachdem mir e erfolgriche Start gha hei, isch der zwoiti Tag natürlich richtig heiss ersehtn worde. Mir hei eis am Nomitag troffe und s Bohnezelt afo ufstelle. Do hei mir au e Kontaktufnahm vom singende Coiffeur us der Region gha, er het sich über d Toi-Tois gärgeret und euis mit de Medie droht. Do mir jo selber au im mediale Bereich tätig si, hei mir dä Vorfall natürlich grad em Fasnachtsblick gmeldet, d MÄHLTIGER si dere Sach denn journalistisch nochgange.

Nocher hei mir euis d Zyt es bitz vertriebe und sie denn am 19.30 Uhr igstange, ums Publikum am Guggekonzert in Zubel z begeischtere.

Mir si vo de Geisse mit feine Essware verpflegt worde und hei den gstärkt der Weg uf Kleinlützel unger d Räder gno. D Lützler hei sich nid loh lumpe und me het sich nachem Betrette vom Mittelalter-Tor imene Fasnachtsdorffescht gfunge. Mir sie eigentlich sehr pünktlich cho, nämlich grad ufe Uftritt und hei der Tell-Saal dörfe zum Choche bringe.

Scho nachem erste Stück hei mir es paar vertrauti Stimme ghört, d Hirzefäger hei nämlich welle, das mir ihre/euise Hit POMPEII spiele. Eigentlich isch de nid uf euisem Programm gstange, aber scho nach em dritte Stück hei mir s Programm umgstellt und d Breitebacher in Guggewahn versetzt.

E richtig geile Uftritt hei mir dank dem Hammer-Publikum dörfe erlebe.

Aschliessend hei mir denn die Fasnachtswelt gnosse und wo d Hirzefäger ihre Uftritt hei dörfe spiele, hei mir euis natürlich au s POMPEII gwünscht. Sie hei euis dr Wunsch denn au erfüllt und es grossartigs Fescht het si Lauf gnoh…

Do gohts zu de Fotene.