Schmutzig Donnstig
„Fasnacht 2024, vorwärts Marsch“ es git nüt schöners, wo mä am 5ii am Morge cha ghöre. Mit dr Chesselte sind mir in d Fasnacht 2024 gstartet und hend Mältigä gweckt. S Ziel vo dr Chesselte isch den bi de Wilde Hühner und enere Mehlsuppe gsii. Vor em Mittag isch es denn witergange mitemene Uftritt z Dornach und am Nomitag isch Kinderfasnacht z Mältigä gsii. An dem Nomitag hend einigi nid nur gspielt, sondern sich au mit em Pfiffe mit de Finger usprobiert. Meh schlecht als recht heimers anebecho. Bliebe mir doch lieber bi de Instrument. Gege Obe isch es denn witergange nach Nunnige, dört heimer zerst im Altersheim gspielt und sind denn witer zu Dorfplatz. Als ersti Gugge heimmer dört s Guggekonzert dörfe eröffne. Nocher ischs Schlag uf Schlag witer gange mit andere Guggene. Wo denn die letzti Gugge gspielt het, sind mit witer nach Erschbel gange und hend um 00:45 Uhr euse Ufritt gha.

Fasnachtsfritig
S Programm vo dem Tag het erst um 17:30 Uhr mit dem Apéro bim Jan gstartet. Vo dört us sind mir denn schnell zum Guggekonzert z Zubel gloffe gsii. Das isch scho in vollem Gang gsii, wo mir acho sind. Bald sind au mir dra gsii mit Spiele. S Wetter isch zwar nid optimal gsii, aber das het dr Stimmig nüt gmacht. Mit em Car sind mir den witer nach Waldeburg an d Sprängerparty gange. Trotz de wenige Lüt, wo dört gsii sind, heimer am 01:50 Uhr ä super Uftritt gha. Wenn chöne scho eusi Schlagzüger während em Narcotic goh d Wand alänge?

Fasnachtssamstig
Ab mit em Car nach Breitebach und miteme Apéro starte, hets am Samstig gheisse. Mir dr Nummer 19 sind mir ziemlich in dr Mitti vom Umzug vo Breitebach gsii. Das Johr hets mit de zweu Durchgäng wieder klappt. Nach em Umzug heimer no dörfe im Wydehof und im Pöstli spiele, bevor euse Car den wieder uf Mältigä gfahre isch. Mir hend nid schlecht gstund, wo mir im Schmitten-Gaudi ä volli Halle atroffe hei. Nach eusem Uftitt dört, hets für eus au Spagetthi geh. Um 23:00 Uhr heimer denn no ä Uftritt am Maskeball z Büsserach gha. D Halle isch voll gsii und kalt het mä dört inne nid becho, vorallem nid bim Spiele.

Fasnachtssunntig
Au am Sunntig heimer wieder miteme Apéro gstartet. Dasmol het eus d Tanja iglade gha. Dr Umzug z Nunnige heimer als Nummer 8 dörfe absolviere und denn heimer no ä Uftritt im Festzält gha. Zwische Auto und dr Kutsche vo de Bohnanzas heimer denn nomol zwei-drei Stück chöne zum Beste geh, bevor mir eus Richtig Meltinge uf e Weg gmacht hei. Danke Geisseschränzer, dass ä paar vo eus hei dörfe bi euch mitfahre. Als Premiere het das Johr ä Nachtumzug z Mältigä statt gfunde. Ganz nach em Motto: „Usem Schatteloch wird Liecht“ heimer eusi Liechterketten agschalte und d Fakle zündet. Nach em Umzug sind mir wie die andere Gugge no de Fasnachtsbeize noche und hend dört no gspielt.

Fasnachtsmentig
Am Mentig durre Tag hend mir frei gha und chli chöne nochschlofe und entspanne. Gege Obe isch es denn witergange mit dem Uftritt im Bad Meltingen. Dörf heimer wie jedes Johr dörfe ä Ständeli spiele für d Bewohner. Dr nechst Halt uf euesem Tourprogramm het Möhlin gheisse. Wo mir acho sind, hets noni viel Lüt gha, abr bis zu eusem Uftritt het sich dr Platz guet gfüllt gha. Bi Platz vo de Guggekonzert hets ä Festzelt gha, wo mir den aus no bespielt hei. Als nid Ortskundigi hend mir den no die witere Festzelt gsuecht (wo eus vo andere versporche worde sind), hend den aber gmerkt, dass sie hüt nid offe sind. Ufem Heiweg heimmer denn no d Pisi-Bar bsuecht und dr Obe loh usklinge.

Fasnachtszitig
Am Zistig het bi eus s Guggekonzert stattgfunde. Zum Ufstelle vo dr Bühni und eusem Getränke- und Essensstand heimer eus deshalb im spötere Nomitag troffe. Mit eusem Uftritt heimer Mältigä in rotes Liecht und Nebel versetzt. Mir hend ganzi 5 Guggene zu Gast gha und hend weg dem so lang gha, dass scho wieder s Postauti ins Dorf ine gfahre isch. Oder hend sie d Bewilligung nid richtig agluegt und sind zu frühe ine gfahre? Man weiss es nicht…
Bevor 12i gsii isch heimer denn no im Schmitten-Gaudi und dr Pisi-Bar gspielt. Scho ziemlich trurig, dass es scho wieder verbi isch, heimer eus denn vo dr Fasnacht verabschiedet.

Tschüss Fasnacht 2024, es isch schön gsii.

Willsch no meh Bild vo euser tolle Fasnacht 2024 gseh? Eifach do klicke.