Probeweekend
26. & 27. November 2016

Wo goi d Bohneschränzer im November immer öbbe ane? Genau, is Blaukrüz Huus in Mont Dedos.
Nachdemm alli der Wecker ghört hei, die letschte Sache no zämmekratzt hei und pünktlich e Viertelstung z spot z Meltige gstange si, hei mir chönne losfahre.

Diesmol hets keine Verfahrer me geh und alli hei ihres Ziel relativ sicher gfunge.
Drum hei mir scho bald e warme Kaffi chönne im Tassli drinke, oder au vom Bode ufwüsche.
E feine Speckguggehopf vom Schnützer Joel sim Mami und e sehr feine Zopf, hei viel zur Motivation bitreit.

Um die 09.00 Uhr hei mit em Ispiele agfange und denn hei mir no es paar Stück zämme gspielt.
Nocher hei sich d Blöser vom Schlag trennt und d Blöser hei ihre neue Bohnehit afo üebe.
A dere Stell es grosses Dankeschön an Sascha, er het euis do würklich was ganz tolles uf d Instrument zaubert und in der Mittagspause sogar no schnell es alts Lied neu ufgschriebe.

Euise Bohnekoch het zwar nid chönne teilneh, aber e feini Lasagne mit ufe Weg geh. So sie mir denn gstärkt in der zwoiti Teil vom Samschtig gschtiege.  Brav hei mir witergüebt und langsam hei die erschte Bier ihre Weg zu de Mühler vo de durstige Bohneschränzer gfunge.

Am sechsi zobe isch denn langsam fertig gsi und vieli Lippene sie froh gsi, das sie langsam hei dörfe entspanne.
pin2016

Um die siebeni zobe isch denn d Taufi vo de neue Pins uf em Programm gstande. Ab sofort choi ihr die bi jedem Bohneschränzer bezieh!

Denn ischs langsam Dunkel worde und mir hei Hunger bercho, ei Person het gar nüm chönne warte und gmeint, d Raclettöffeli sige nonig heis, aber was me scho als chlises Kind nid glernt het, chame als Erwachsene scho gar nüme.

Denn hei mir e Vesruech gmacht und an der #mannequinchallange teilgnoh und will das soviel Spass gmacht het,wei mir Euch das nid vorenthalte.

D Nachrueh het lang uf sich loh warte und der eint oder ander isch am Morge mitemene Kater ufgwache.
Die wo hei möge, sie go Zmorge Esse und hei sich für die letschte Probe gstärkt.

Mir hei denn no bitz probiert d Luft dur d Instrument durezloh und hei is denn scho glie vom schöne und sunnige Jura verabschiedet und si i d Nebelsuppe hei.

D Fotene vom Probeweekend fingsch do!