Indiaca-Night 2016
Samstag, 29. Oktober 2016
Gspannt bis in d Zechespitze.
Konzentriert bis in d Hoorspitze.
Getränk fescht umklammerte mit de Fingerspitze!
Volle Isatz isch s Motto vo dere Indiaca-Night gsi!
Nachdem mir euis geschter am Saufescht musikalisch uf d Fasnacht vorbereitet hei, isch hüt d Indiaca-Night ufem Programm gstange.
So hei mir grad chönne luege, ob mir auf fitnessmässig ufemene guete Stang si und für d Umzüg grüstet si.
Ufstellig Bohneschränzer 1: Tobias, Sarah, Sascha, Patrizia, Kathrin
Ufstellig Bohneschränzer 2: Rita, Marco, Tanja, Patrik, Sandro, Patrick
Bedi Mannschafte si mit Elan is Spielgschehe gstartet und d Bohneschränzer 1 hei grad e Sieg errunge. D Bohneschränzer 2 hei am Afang e knappi Niederlag igsteckt und hei sich denn abem zwoite Matsch au chönne steigere.
D Bohneschränzer 1 hei ei Sieg am andere anenander chönne areihe und sie als Gruppesieger i d Finalrundi izoge.
D Bohneschränzer 2 si ufem dritte Platz in d Schlussrundi izoge.
Beidi Mannschafte hei kämpft, nid nur mit em Indiaca, mängisch au mit de Getränk. D Stimmig isch usglasse gsi und der Obe isch lang worde. Me het immer wieder chönne stuhne, was do so für Talent unter euis schlummere, aber vorallem het eim der Teamgeist imponiert.
A der Rangverkündigung hei den d Bohneschränzer 1 der 5ti Platz dörfe erklimme und d Bohneschränzer zwoi si 12te vo 20 worde.
Das het me denn natürlich an der Bar no bitz gfirret Es dankschön an dere Stell an d Organisatore vom TV Meltingen, für de tolli Alass, wo sie jetz scho zum 10. Mol dureführe!